News in english

═slensku Tˇnlistarver­launin

 

 

Félag tónskálda og textahöfunda óskar öllum vinningshöfum Íslensku Tónlistaverðlaunana 2009 til hamingju með itcfrábæran árangur.

Vinningshafar:

Umslag ársins:

Swordplay and guitarslay - Retrön - Arnar Ingi Viðarsson, Kári Halldórsson og Kolbeinn Hugi Höskuldsson hönnuðu. Nördaleg einlægni geislar af þessari vísun í Dungeons & Dragons spil níunda áratugarins. Umslagið er umbreytanlegt í kastalavirki með sýki og öllu. Mjög viðeigandi með ævintýralegum metalnum á plötunni.

Bjartasta vonin:

Sudden Weather Change. Kraftmikil gítarsveit undir áhrifum frá amerísku jaðarrokki. Fyrsta platan þeirra er ekkert slor, en jafnast þó ekki á við kraftinn og spilagleðina sem einkennir þá fimmmenninga á tónleikum.

Rödd ársins:

Sigríður Thorlacius, fyrir söng sinn með Hjaltalín og á plötunni Á ljúflingshól með Heiðurspiltum. Sigríður hefur fallega rödd og skýra og áreynslulausa framsetningu.

Tónlistarflytjandi ársins:

Davíð Þór Jónsson, fyrir fjölþreifni til hljóðfæra, fjölhæfni í stíltegundum tónlistarinnar og eiginleikann að virðast geta komið fram á mörgum stöðum í einu.

Höfundur ársins:

Daníel Bjarnason, fyrir tónverkin á plötunni Processions. Tónlist Daníels er kraftmikil, dansar á mörkum ótal landamæra og er afar persónuleg.

Tónverk ársins:

Bow to string, eftir Daníel Bjarnason. Verk Daníels er geysifallegt og um leið nútímalegt og persónulegt. Verkið verður án efa einn af hornsteinum verkasafns Daníels og er um leið þýðingarmikil viðbót í safn íslenskrar sellótónlistar.  Verkið er rómantík á nútíma vísu.

Lag ársins:

Dreamin‘, lag og texti: Rósa Birgitta Ísfeld og Einar Tönsberg, flytjendur: Feldberg.

Sígild tónlist og samtímatónlist - Plata ársins:

Haydn píanókonsertar - Edda Erlendsdóttir píanóleikari og Sinfóníuhljómsveit Íslands, útgefandi: Erma. Edda Erlendsdóttir túlkar fjóra píanókonserta Haydns af mikilli fágun og innlifun en hún hefur áður sýnt næman skilning á höfundarverki hans. Túlkun Sinfóníuhljómsveitar Íslands er sömuleiðis leikandi létt og býr yfir smitandi leikgleði. Hljóðritun afbragðs góð

Jazzplata ársins:

Adhd - Adhd, útgefandi ADHD. Lágstemmd og spennuþrungin í senn. Ákaflega vel spilandi kvartett sem galdrar fram stemmningar í hróplegu ósamræmi við nafn hljómsveitarinnar.

Poppplata ársins:

Terminal - Hjaltalín, útgefandi: Borgin. Á Terminal heldur Hjaltalín áfram að vinna með kammerpoppið sem þau kynntu til sögunnar á Sleepdrunk Seasons, en á Terminal eru lögin fágaðri og meira unnin auk þess sem á plötunni má greina áhrif frá söngleikjatónlist og eðalpoppi sjöunda áratugarins. Sérstaklega heilsteypt og öflug plata. 


Vinsælasti flytjandinn á vefnum Tónlist.is og í símakosningu ÍTV var valin hljómsveitin DIKTA

Reykjavík loftbrú veitti Emilíönu Torrini veglegan ferðastyrk sem viðurkenningu fyrir glæsilegan árangur hennar erlendis

Tónlist.is veitti Ólafi Arnalds netverðlaun ársins fyrir glæsilegan árangur við kynningu á tónlist sinni á veraldarvefnum

Jón Nordal fékk heiðursverðlaun íslensku tónlistarverðlaunanna 2010