Valgeir okkar Guðjónsson varð sextugur í gær, 23.janúar og er fyllsta ástæða til að flytja honum hér árnaðaróskir FTT-félaga. Hann var formaður FTT og STEFs í upphafi níunda áratugar síðustu aldar og er einn ástsælasti hryntónlistarmaður Íslendinga.
Kappinn hélt magnaða afmælistónleika fyrir stútfullum sal Eldborgar í Hörpunni á sunnudagskvöldið og fór þar í gegnum farsælan feril í tali og tónum ásamt góðu tónlistarfólki. Sigrún Hjálmtýsdóttir, Diddú, afhenti honum þar blómakörfu og koníaksflösku frá FTT auk þess sem Kjartan Ólafsson, formaður STEFs sæmdi hann heiðursmerki STEFs, Gullna hananum, en merkið hafa áður hlotið ýmsir þeir er stuðlað hafa að aukningu höfundarréttargjalda, þ.á.m. söngvararnir Haukur Morthens, Björgvin Halldórsson og Pavarotti.
Það er því vel við hæfi að lag vikunnar komi úr smiðju afmælisbarnsins. Afasöngur þessi er að finna á plötunni, Lög unga fólksins en þar komu saman nokkur Hrekkjusvín og fluttu lög Valgeirs Guðjónssonar og Leifs Haukssonar við texta Péturs Gunnarssonar.
Nýársfundur FTT var haldinn s.l. fimmtudagskvöld, 5.janúar, á KEX-hostel við Skúlagötu.
Það er skemmst frá því að segja að mæting var glimrandi og fundarmenn nutu samvista hvor við annan. Formaður vor, Jakob Frímann Magnússon, fór yfir síðasta ár hjá FTT auk þess að líta fram á veginn og brýna félagsmenn til dáða því þrátt fyrir að hlutir þokist í rétta átt í réttindamálum höfunda þá er enn langt í land svo allir verði sáttir. Hann svaraði síðan spurningum úr sal og því loknu sagði Margrét Kristín Sigurðardóttir frá Söngvasmiðju ársins 2011.
Fálkaorðuhafanum Ragnhildi Gísladóttur var afhentur blómvöndur frá félaginu og tónlistarkonan Elín Ey flutti nokkur frumsamin lög við mikinn fögnuð viðstaddra.
Þegar formlegri dagskrá var lokið tóku menn til við spjall í hinum góðu húsakynnum og var glatt á hjalla fram eftir kveldi.
Hrynheimsfréttir koma út einu sinni á ári í prentuðu formi og sendar félagsmönnum. Ykkur gefst nú tækifæri á að skrifa stutta grein eða pistil í blaðið ef það er eitthvað sem býr innra með ykkur og þið viljið hleypa út og deila með okkur hinum. Skilafrestur er til mánudagsins 12.janúar kl.23.59.59 og sendið á netfangið jon@ftt.is merkt HRYNHEIMSFRÉTTIR. Bundið mál er velkomið en langlokur afþakkaðar!
Fallinn er frá góður liðsmaður íslenskrar dægurtónlistar, Ólafur Þórðarson, oftast kenndur við Ríó Tríó. Hann lést á Grensásdeildinni í morgun en hann komst aldrei til meðvitundar eftir að sonur hans réðst á hann fyrir rúmu ári.
Ólafur var fæddur árið 1949 í Glerárþorpi á Akureyri. Hann var menntaður tónlistarkennari og átti að baki glæstan feril með fjölmörgum hljómsveitum. Þar ber hæst Ríó Tríó, en einnig spilaði hann með hljómsveitunum Kuran Swing og South River Band, svo einhverjar séu nefndar. Hann rak einnig í mörg ár umboðsskrifstofu fyrir listamenn.
FTT vottar aðstandendum og vinum Ólafs dýpstu samúð.
